జైశ్రీరామ్.
ఓం శ్రీమాత్రే నమః.
శ్రీ తోపెల్ల వారిచే బ్రహ్మశ్రీ వైద్యంవేంకటేశ్వరాచార్యులవారికి
సాహితీచిత్రగుప్త బిరుదు ప్రదానము జరిగిన సందర్భముగా
చిత్రకవితాంజలి.
రచన. చింతా రామకృష్ణారావు.
శా. శ్రీమన్మంగళ వైద్యమన్ గృహమునన్ శ్రీవేంకటేశుల్ శుభ
శ్రీమార్గాద్భుత సత్ప్రవర్తనపరుల్ చెల్వొంద జన్మించి స
చ్ఛ్రీమద్భాసుర సత్కవిత్వమున సచ్చిత్రంపు సత్ సాహతీ
భూమిన్ జూపిన చిత్రగుప్తునిలపై పోషింపుమా శ్రీహరీ!
చతుర్వింశత్యధిక ద్వివిధకంగ గీత గర్భ చంపకమాల.
వర గుణ భాగ్యధా! విజయ వర్ధన చిత్రకవిత్వరూపధా!
స్తిర ఘనుఁడా! లసన్ మతిని దీప్తిని గొల్పెడి మాన్య సారథీ!
పర గణుఁడా! నతుల్, వినుత వైద్య నయాన్వయ వేంకటేశ! మా
చిర వినుతాక్షరా! జయము చిందును మీదు ప్రశాంత శోభతోన్.
చం. వరపురుషోత్తమార్యులకు భాసిలు కృష్ణమకున్ జనించి స
న్నిరుపమ కీర్తి గొల్పితివి నీవరవంశజులెల్లఁ బొంగగన్,
సరిగన లేరు నీకనగ చక్కని చిత్ర కవిత్వ శోధనన్
ధర వెలుగొందితీవు, శుభదాయక నిన్ను శుభాళి చేరుతన్.
షడర బంధ్ శార్దూలము.
3వ వృత్తములో (రా-మ-కృ-ష్ణ-క-వి)
6వ వృత్తములో (సు-క-వి-వై-ద్యము)
వృత్త కేంద్రమున (వి)
ధన్యా! రా, మన సు న్నసత్క వి కిలన్ దా వై నకృ ష్ణ! క్ష మా
గణ్యా! మ ఞ్జు ల క ల్ప నా క వి కృతిన్ గ ద్య ప్ర భా క ల్ప మున్
పుణ్యా కృ ష్ట సు వి ద్య నిమ్ము వి ధి గా భో! ము ద్దుగా విష్ణు! మా
మాన్యా మా ధ వ! భో గ భాగ్య పు గతుల్, మా న్యత్వ మున్ గొల్పుమా.
సీ. శ్రీనివాసశతక, చెన్నరాయ శతక, జయ సుదర్శనచక్ర శతక, తెలుఁగు
భాషాశతకనామ భాస్వత్కృతుల్ ద్వాద శంబమోఘంబుగా సన్నుతముగ
వ్రాసి, వ్యాసములెన్నొ వాసిల్లగా వ్రాసి, లెక్కయేలేనన్ని పెక్కు కృతులు
చిత్రకవిత్వాన చెలఁగువాటిని గొని, చిత్రించి జనులకు చేర్చినావు.
తే.గీ. పెక్కుబిరుదులు నినుఁ జేరె, నిక్కముగను,
సాహితీచిత్రగుప్తుఁడన్ సార్థకమగు
బిరుదు తోపెల నీకిచ్చె, వరలుమిలను.
మంగళంబులు నీకు సన్మంగళములు.
మంగళం మహత్ శ్రీశ్రీశ్రీశ్రీశ్రీ
జైహింద్.
No comments:
Post a Comment