శ్రీ మహాలక్ష్మీస్తోత్రమ్.

జైశ్రీరామ్.

శ్రీ మహాలక్ష్మీస్తోత్రమ్.

పురందర ఉవాచ. 

నమః కమలవాసిన్యై నారాయణ్యై నమో నమః | 

కృష్ణప్రియాయై సతతం మహాలక్ష్మై నమో నమః || 1 ||

పద్మపత్రేక్షణాయై చ పద్మాస్యాయై నమో నమః | 

పద్మాసనాయై పద్మిన్యై వైష్ణవ్యై చ నమో నమః || 2 ||

సర్వసంపత్స్వరూపిణ్యై సర్వారాధ్యై నమో నమః | 

హరిభక్తిప్రదాత్ర్యైచ హర్షదాత్ర్యై నమో నమః || 3 ||

కృష్ణవక్షఃస్థితాయై చ కృష్ణేశాయై నమో నమః | 

చంద్రశోభాస్వరూపాయై రత్నపద్మే చ శోభనే || 4 ||

సంపత్యధిష్ఠాతృదేవ్యై మహాదేవ్యై నమో నమః | 

నమో వృద్ధిస్వరూపాయై వృద్ధిదాయై నమో నమః || 5 ||

వైకుంఠే యా మహాలక్ష్మీర్యా లక్ష్మీః క్షీరసాగరే | 

స్వర్గలక్ష్మీరింద్రగేహే రాజలక్ష్మీర్నృపాలయే || 6 ||

గృహలక్ష్మీశ్చ గృహిణాం గేహే చ గృహదేవతా | 

సురభిస్సాగరే జాతా దక్షిణా యజ్ఞకామినీ || 7 ||

అదితిర్దేవమాతా త్వం కమలా కమలాలయా | 

స్వాహా త్వం చ హవిర్దానే కవ్యదానే స్వధా స్మృతా || 8 ||

త్వం హి విష్ణుస్వరూపా చ సర్వాధారా వసుంధరా | 

శుద్ధసత్వస్వరూపా త్వం నారాయణపరాయణా || 9 ||

క్రోధహింసావర్జితా చ వరదా శారదా శుభా | 

పరమార్థప్రదా త్వం చ హరిదాస్యప్రదా పరా || 10 ||

యయా వినా జగత్సర్వం భస్మీభూతమసారకం | 

జీవన్మృతం చ విశ్వం చ శశ్వత్సర్వం యయా వినా || 11 ||

సర్వేషాం చ పరా మాతా సర్వబాంధవరూపిణీ | 

ధర్మార్థకామమోక్షాణాం త్వం చ కారణరూపిణీ || 12 ||

యథా మాతా స్తనాంధానాం శిశూనాం శైశవే సదా ! 

తథా త్వం సర్వదా మాతా సర్వేషాం సర్వరూపతః || 13 ||

మాతృహీనఃస్తనాంధస్తు స చ జీవతి దైవతః | 

త్వయా హీనో జనః కోzపి న జీవత్యేవ నిశ్చితం || 14 ||

సుప్రసన్నస్వరూపా త్వం మాం ప్రసన్నా భవాంబికే | 

వైరిగ్రస్తం చ విషయం దేహి మహ్యం సనాతని || 15 ||

అహం యావత్త్వయా హీనో బంధుహీనశ్చ భిక్షుకః | 

సర్వసంపద్విహీనశ్చ తావదేవ హరిప్రియే ॥16॥

జ్ఞానం దేహి చ ధర్మం చ సర్వసౌభాగ్యమీప్సితం | 

ప్రభావం చ ప్రతాపం చ సర్వాధికారమేవ చ | 17 ||

జయం పరాక్రమం యుద్ధే పరమైశ్వర్యమేవ చ | 

ఇత్యుక్త్వా చ మహేంద్రశ్చ సర్వైః సురగణైః సహ || 18 ||

ప్రణనామ సాశ్రునేత్రో మూర్ధ్నా చైవ పునః పునః | 

బ్రహ్మా చ శంకరశ్చైవ శేషో ధర్మశ్చ కేశవః || 19 ||

సర్వే చక్రుః పరిహారం సురార్థే చ పునః పునః | 

దేవేభ్యశ్చ వరం దత్వా పుష్పమాలాం మనోహరాం || 20 ||

కేశవాయ దదౌ లక్ష్మీః సంతుష్టా సురసంసది | 

యయుర్దేవాశ్చ సంతుష్టాః స్వం స్వం స్థానం చ నారద || 21 ||

దేవీ యయౌ హరేః స్థానం హృష్టా క్షీరోదశాయినః | 

యయతుశ్చైవ స్వగృహం బ్రహ్మేశానౌ చ నారద || 22 ||

దత్వా శుభాశిషం తౌ చ దేవేభ్యః ప్రీతిపూర్వకం | 

ఇదం స్తోత్రం మహాపుణ్యం త్రిసంధ్యం యః పఠేన్నరః || 23 ||

కుబేరతుల్యః స భవేద్రాజరాజేశ్వరో మహాన్ | 

పంచలక్షజపేనైవ స్తోత్రసిద్ధిర్భవేన్నృణాం ॥24॥

సిద్ధస్తోత్రం యది పఠేన్మాసమేకం తు సంతతం | 

మహాసుఖీ చ రాజేంద్రో భవిష్యతి న సంశయః || 25 ||

శ్రీ మహాలక్ష్మీ స్తోత్రం సమాప్తమ్.

జైహింద్.